Shakira dhe ish-futbollisti Gerard Piqué janë përballur sërish në gjykatë për mënyrën se si do të organizohen takimet e tij me dy djemtë e tyre, Milan dhe Sasha. Të dy u paraqitën të martën në Gjykatën e Barcelonës, në kuadër të rishikimit të marrëveshjes së arritur pas ndarjes së tyre në vitin 2022.

Dy djemtë, tashmë 13 dhe 11 vjeç, jetojnë me Shakirën në Miami që prej prillit 2023.

Në një deklaratë për mediat, këngëtarja kolumbiane ka sqaruar se kërkesa e saj nuk synon të kufizojë kohën që fëmijët kalojnë me babain e tyre. Ajo kërkon që udhëtimet mes Miamit dhe Barcelonës të mos bien vetëm mbi dy fëmijët.

Propozimi i Shakirës është që barra e udhëtimeve të ndahet mes prindërve. Për periudhat e shkurtra të pushimeve, ajo kërkon që Piqué të udhëtojë drejt Miamit, në mënyrë që djemtë të shmangin udhëtimet transatlantike për vetëm pak ditë dhe lodhjen e shkaktuar nga ndryshimi i orarit.

Sipas Shakirës, reduktimi i udhëtimeve të shkurtra do t’u mundësonte Milanit dhe Sashës të ruanin më mirë rutinën e tyre shkollore, jetën sociale dhe lidhjet familjare. Ajo argumenton se kjo do të ndihmonte në mbrojtjen e “mirëqenies së tyre emocionale, fizike dhe akademike”.

Këngëtarja ka kërkuar gjithashtu që të respektohet privatësia e dy fëmijëve.

Shakira udhëtoi drejt Barcelonës gjatë një periudhe pushimi nga koncertet e saj në Madrid. Edhe Piqué u paraqit në seancë, ndërsa sipas avokatit të tij, Ramón Tamborero, palët kishin vijuar negociatat deri në momentet e fundit.

Sipas raportimeve, edhe gjyqtarja dhe prokuroria kishin ndërhyrë në përpjekje për të arritur një marrëveshje dhe për të shmangur seancën gjyqësore.

Nga dashuria te ndarja
Shakira dhe Piqué u njohën pak para Botërorit të vitit 2010 në Afrikën e Jugut. Këngëtarja performoi këngën “Waka Waka” në ceremoninë e mbylljes, ndërsa Piqué ishte pjesë e kombëtares spanjolle që fitoi turneun.

Çifti u bë publik dhe në janar 2013 lindi djali i tyre i parë, Milan. Dy vite më vonë erdhi në jetë Sasha. Të dy fëmijët kanë lindur në Barcelonë.

Pas më shumë se 12 vitesh së bashku, çifti njoftoi ndarjen në qershor të vitit 2022. Në nëntor të po atij viti, ata arritën një marrëveshje sipas së cilës fëmijët do të jetonin me Shakirën, ndërsa Piqué do të kishte mundësi t’i takonte dhe të kalonte kohë me ta.

Në prill 2023, Shakira u largua përfundimisht nga Barcelona së bashku me dy djemtë dhe u vendos në Miami. Ajo tha në atë kohë se synonte t’u ofronte fëmijëve një fillim të ri, pranë familjes, miqve dhe detit.

Tani, pas më shumë se tre vitesh, çështja e mënyrës së takimeve të Piqués me djemtë është rikthyer përpara drejtësisë spanjolle, duke rihapur diskutimin mbi marrëveshjen e kujdestarisë të arritur pas ndarjes së çiftit.