Tensionet me Moskën, Danimarka kërkon kufizime të ashpra të vizave në zonën Shengen për qytetarët rus

Europë | 7 minuta më parë

Danimarka u ka kërkuar vendeve anëtare të Bashkimit Evropian që të ndërmarrin hapa konkretë dhe të koordinuar kundër Rusisë, pasi autoritetet e saj deklaruan se kanë parandaluar një atentat të planifikuar nga shërbimet ruse të inteligjencës në territorin danez. Kërkesa është përcjellë përmes një note diplomatike të dërguar qeverive të BE-së dhe të konfirmuar nga burime diplomatike.

Sipas policisë daneze dhe zyrtarëve të sigurisë, komploti i shmangur në muajin shtator kishte si objektiv vrasjen e një reperi amerikano-ukrainas, përpara një koncerti të tij. Duke reaguar ashpër ndaj ngjarjes, Ministri i Jashtëm danez, Lars Løkke Rasmussen, e cilësoi incidentin si një “shkelje të papranueshme”, ndërsa Kopenhageni njoftoi menjëherë dëbimin e atasheut të mbrojtjes të Rusisë. Nga ana tjetër, Ambasada ruse në Kopenhagen i hodhi poshtë akuzat, duke pretenduar se ato nuk mbështeten me prova.

Në dokumentin e qarkulluar mbrëmjen e së premtes te diplomatët e lartë evropianë, Danimarka propozon kufizime të reja dhe të unifikuara për aksesin e shtetasve rusë në zonën e lëvizjes së lirë Shengen, e cila përfshin 29 vende. Konkretisht, Kopenhageni sugjeron ndalimin e plotë të vizave turistike për qytetarët rusë, ndërprerjen e njohjes së pasaportave ruse jo-biometrike në të gjithë zonën, përdorimin e shtuar të vizave me kufizim territorial, si dhe masa të rrepta hyrjeje për luftëtarët aktualë dhe ish-luftëtarët rusë.

Propozimet daneze pritet të prezantohen zyrtarisht të hënën gjatë një takimi të ambasadorëve të BE-së në Bruksel.

“Ne duhet të ndërmarrim veprime konkrete që projektojnë forcën dhe vendosmërinë evropiane”, thuhet në notën zyrtare, ku theksohet se është momenti i duhur “për të zëvendësuar mozaikun tonë aktual të masave kombëtare me një qasje vërtet të unifikuar në të gjithë BE-në”.

Zhvillimet në Kopenhagen kanë gjetur mbështetjen e menjëhershme të Brukselit. Presidentja e Komisionit Evropian, Ursula von der Leyen, deklaroi se BE-ja qëndron në solidaritet të plotë me Danimarkën dhe me të gjitha shtetet anëtare që përballen me sulmet hibride ruse. Ajo bëri të ditur se blloku do të propozojë së shpejti një “Strategji të re Evropiane të Sigurisë” për të rritur gatishmërinë dhe aftësitë parandaluese.

Paralelisht, Komisioni Evropian po përgatit prezantimin e paketës së 22-të të sanksioneve kundër Moskës, në vijim të masave ndëshkuese për pushtimin në shkallë të plotë të Ukrainës, ku kufizimet e vizave raportohet se janë ndër pikat kryesore që po shqyrtohen.

/rtsh.al/

 


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme