Zgjedhjet e sotme parlamentare në Letoni kanë konfirmuar qartë orientimin pro-perëndimor të këtij shteti baltik. Sipas të dhënave të para nga sondazhet e daljes nga votimi (exit polls), forca politike “Lista e Përbashkët” e Kryeministrit në detyrë, Andris Kulbergs, ka arritur një fitore bindëse duke siguruar 35.6% të votave. Kjo shifër shënon një rritje prej 24 pikësh përqindjeje krahasuar me rezultatin e zgjedhjeve të mëparshme.

Kryeministri Kulbergs, i cili njihet për linjën e tij të prerë në mbrojtje të sigurisë kombëtare, mbështet fuqimisht forcimin ushtarak të Letonisë si dhe vijueshmërinë e ndihmës për Ukrainën.

Domosdoshmëria e koalicionit dhe sfidat e sigurisë

Pavarësisht fitores së qartë, raportohet se rezultati ishte gjerësisht i parashikueshëm dhe se Kryeministrit Kulbergs do t’i duhet të formojë një koalicion me parti të tjera parlamentare për të siguruar shumicën e nevojshme për qeverisje.

Gjatë fushatës elektorale, tematike kryesore që dominuan diskursin publik ishin siguria kombëtare dhe rritja e kostos së jetesës. Si shtet anëtar i NATO-s dhe Bashkimit Evropian që kufizohet me Rusinë, Letonia mbetet mjaft e ndjeshme ndaj zhvillimeve rajonale, për më tepër që në territorin e saj jeton edhe një pakicë e konsiderueshme rusishtfolëse.

Rezultatet e forcave të tjera dhe rënia e të Gjelbërve

Në këto zgjedhje është vënë re edhe një rritje e mbështetjes për aleancën populiste të krahut të djathtë dhe pro-ruse (“Pushteti Sovran” dhe “Letonezët e Rinj”), e cila mori 10.6% të votave. Kjo aleancë zhvilloi një garë të ngushtë për vendin e dytë me Partinë populiste “Letonia e Para” (LPV) të manjatit Ainars Slesers, e cila mori 11.3% të votave; subjektin “Progresivët”, i cili siguroi 11.1% të votave.

Surpriza dhe humbësi më i madh i këtij procesi zgjedhor ishte Unioni i të Gjelbërve dhe Fermerëve (ZZS). Me vetëm 3.7% të votave, kjo parti nuk arriti të kalojë pragun elektoral prej 5%. ZZS ka qenë pjesë kryesore e udhëheqjes politike letoneze për dekada të tëra, duke ndihmuar që në vitin 2004 Letonia të bëhej vendi i parë në BE me një kryeministër nga radhët e të Gjelbërve.

/rtsh.al/