Komisioni Qendror i Zgjedhjeve ka nisur punën për zëvendësimin në Kuvend të deputetëve që hoqën dorë nga mandati, për të garuar për kryetar bashkie në zgjedhjet lokale të 14 majit.

Në njoftimin e KQZ-së mbi mbledhjen e kësaj të mërkure (12 prill) bie në sy fakti se Ilir Beqja nuk ka pranuar të marrë mandatin e deputetit, që i kalonte atij pas largimit të Benet Becit, i cili do të kandidojë për Partinë Socialiste për të marrë drejtimin e Bashkisë së Shkodë në garën e 14 majit. Në renditjen e KQZ-së, pas Beqjes është Frrok Gjini, i cili pritet të marrë mandatin e deputetit.

Ndërkohë, në listën e Partisë Demokratike, pas largimit të Zef Hilës që do të kandidojë për kreun e Bashkisë së Vaut të Dejës në radhë ishte Bardh Spahia, por as ky i fundit nuk mund ta pranojë mandatin për shkak se do të kandidojë për Bashkinë e Shkodrës. Pas Spahisë, në radhë për të marrë mandatin e deputetit është Lodovik Hasani.

“Për shpalljen e moszgjedhshmërisë së kandidatit të radhës në listën shumemërore të Partisë Socialiste të Shqipërisë, Qarku Shkodër, z. Ilir Hamit Beqaj, për plotësimin e vakancës së njoftuar nga Kuvendi i Shqipërisë.  Për shpalljen e moszgjedhshmërisë së kandidatit të radhës në listën shumemërore të Koalicionit Partia Demokratike – Aleanca për Ndryshim, Qarku Shkodër, z. Bardh Ali Spahia, për plotësimin e vakancës së njoftuar nga Kuvendi i Shqipërisë“, thuhet në njoftimin e KQZ.  

/rtsh.al/