Çështja e votës së emigrantëve është ndër më të debatuarat në Grupin e Dialogut mes PS dhe opozitës, por as ajo nuk është një çështje që ka konsensus. Të paktën deri tani. Oerd Bylykbashi, që drejton palën e opozitës në bisedime tregon dallimet e propozimit të PS dhe të PD, duke theksuar se KQZ e pranon variantin e PD.

“Ne kemi 1.8-2 milionë shtetas shqiptarë me të drejtë vote që jetojnë jashtë. Janë të regjistruar 18 mijë persona në Ministrinë e Brendshme, përmes e-Albania. Po të pranojmë ketë, lejojmë të votojnë vetëm 1% e emigrantëve që filtruar nga sistemi i patronazhimit të PS. Gjëja tjetër që kërkon është detyrimi i emigrantëve për të patur një rezidencë të ligjshme, por ne e dimë shumë mirë që një pjesë e mirë e tyre nuk kanë një të tillë.

Pra, ndërkohë që PS thotë të regjistrohet në e-Albania, të deklarojë rezidencën, pastaj të regjistrohet në KQZ, PD thotë që procesi të kryhet me një hap të vetëm, drejtpërdrejt në KQZ, që thotë se nuk i duhet domosdoshmërish adresa e ligjshme atje. Mjafton një e dhënë e sigurt që ky person është jashtë Shqipërisë. Me këtë mekanizëm të thjeshtë, ne i hapim të drejtën e votës të gjithë shqiptarëve që jetojnë jashtë, jo vetëm 18 mijë personave që ka filtruar PS”- tha Oerd Bylykbashi për emisionin “Pa Censurë”.

Po a rrezikon që ky propozim t’i hapë rrugë votimit të dyfishtë? Nënkryetari i PD thotë se i është gjetur zgjidhja dhe kësaj çështje. “Shtetasi shqiptar ka një detyrim, të deklarojë veten që është jashtë vendit, në mënyrë të vërtetë, në të kundërt ka penalitete. KQZ thotë se e merr përsipër këtë pjesë. Ne marrim përsipër të pranojmë që kushdo që deklarohet jashtë, të hiqet nga qendra e votimit në Shqipëri. Kjo pastron listën.”- u shpreh zoti Bylykbashi, i cili këmbëngul se ky është varianti më i mirë që PS nuk e kontrollon dot.

“Në momentin që hapet diapazoni për këdo, ata nuk kontrollojnë dot më votën. Gjykoj që zgjedhësit që jetojnë jashtë janë baseni më i madh i votave të lira të shqiptarëve, por jo votave të lira, përsa i përket pagesës, votave të lira, të pandikuara nga pushteti.”- u shpreh Oerd Bylykbashi për RTSH.

/rtsh.al/