Deputeti i Partisë Socialiste Lavdrim Krashi ka deklaruar në studion e RTSH24 se emigracioni ilegal të shqiptarëve në drejtim të Mbretërisë së Bashkuara ka rënë në raport me vitet e kaluara.

Duke komentuar vizitën në Tiranë të sekretarit të Jashtëm britanik, David Kameron, Krashi theksoi se marrëveshja Rama–Sunak ka dhënë rezultatet e veta.

Sipas Krashit, tashmë emigracioni ilegal ka rënë me 95 për qind dhe tashmë Shqipëria shihet si një vend i sigurt.

“Një nga arsyet e vizitës së David Cameron në Shqipëri ishte për të falënderuar qeverinë shqiptare në fushën e sigurisë, veçanërisht në fushën e emigracionit ilegal.

Siç dihet në vitin 2022 qeveritë e të dyja vendeve e adresuan atë problem dhe ne kemi një situatë krejt tjetër, ku numri i shqiptarëve në emigracionin ilegal për Mbretërinë e Bashkuar është ulur në mënyrë të konsiderueshme rreth 95 për qind por ne shihemi si vend i sigurt për të ndihmuar edhe vendet e tjera të BE-së nga përdorimi i vendit tonë si vend transit nga emigracioni global”, u shpreh Krashi.

/rtsh.al/