Në praninë e liderëve europianë dhe të rajonit, është përuruar Kolegji i Europës, i pari kampus jashtë BE-së. Në fjalën e tij, kryeministri Edi Rama vlerësoi këtë moment si të “mahnitshëm”, teksa tha se dija është dhurata më e “jashtëzakonshme” që BE i bën vendit tonë. Edhe njëherë, kryeministri theksoi vendosmërinë e Shqipërisë për të ecur në rrugën drejt Bashkimit Evropian.

“Sot hapen dyert e zyrës së përfaqësimit dhe vitin tjetër, njerëzit do të nisin mësimet e tyre në Kolegjin e Europës në Tiranë. Diçka po ndodh vërtetë dhe është kaq e mahnitshme. BE është një bekim për të gjitha vendet tona sepse është burimi më i thellë i dijes sesi të ndërtohen institucionet dhe në fund janë institucionet që bëjnë dallimet. E shkruar jonë është përcaktuar nga shumë gjëra të këqija që ishin rezultat i mungesës së institucioneve. Ndërtimi nga e para i institucioneve demokratike është diçka që s’mund ta bësh nëse nuk ke BE që të mëson si ta bësh. Dija është dhurata më e jashtëzakonshme që BE na jep ne dhe vendeve si ne. Ne ankohemi, ndonjëherë edhe bërtasim, ka momente që duam të heqim dorë se nuk është e lehtë, por është e vetmja rrugë”, tha Rama.

Ministrja e Arsimit, Ogerta Manastirliu, e konsideroi hapjen e Kolegjit si një hap monumental.

“Është një hap monumental. Sot jo vetëm kremtojmë ngritjen e një pranie fizike, por rikonfirmojmë angazhimin tonë të përbashkët ndaj fuqisë transformuese të arsimit. Kolegji i Evropës ka qenë farë ndriçues i integrimit evropian, kyç për të arsimuar disa breza udhëheqësish. Ndërsa hapim dyert e kësaj zyre përfaqësimi, e bëjmë këtë me shpresën që vetëm arsimi mund të na ushqejë. Nuk është vetëm transferim dijesh, por kultivimi i një mendësie që përfaqëson ndryshimin, novacionin dhe bashkëpunimin. Kolegji i Evropës njeh rëndësinë e BP në kontekstin më të gjerë evropian. Është një nismë që të do fuqizojë brezat e ardhshëm të udhëheqësve e studiuesve”, u shpreh ministrja.

Për herë të parë një strukturë e mirëfilltë pasuniversitare i vjen Tiranës me emrin e Kolegjit Europian të Bruzhit. E njëjta diplomë evropiane, të njëjtët profesorë e lëndë do të përgatisin në Tiranë aspiruesit për udhëheqës evropianë në nivel masteri. Kolegji i Europës do të vendoset në një nga simbolet e transformuara të kryeqytetit, te Piramida, ndërsa do të nisë punën në Tiranë nga shtatori i vitit 2024.

/rtsh.al/