Komisioni Ankimimeve dhe Sanksioneve ka rrëzuar tre kërkesa ankimore, lidhur me shpalljen të pavlefshme të zgjedhjeve vendore 2023, në disa qendra votimi në Tiranë, Kamzë. Kërkesat ankimore për pavlefshmëri për 2 qendra në Tiranë dhe një në Kamzë, ishin bërë nga Partia Lëvizja e Legalitetit.

KAS, pasi ka shqyrtuar elementët e formës dhe të përmbajtjes së kërkesave ankimore, në përfundim të shqyrtimit paraprak, vendosi pushimin e shqyrtimit të kërkesës ankimore të depozituar nga Partia Lëvizja e Legalitetit me objekt “Shpalljen e pavlefshme të zgjedhjeve në QV NR. 1885, nr 1573 në Bashkinë Tiranë, si dhe moskalimin për shqyrtim të kërkesave ankimore të depozituar nga Partia Lëvizja e Legalitetit me objekt “Shpalljen e pavlefshme të zgjedhjeve në QV nr. 1597/2, nr. 1575, Bashkia Kamzë”, si dhe “Shpalljen të pavlefshme të zgjedhjeve në QV-të nr. 1885/02,2020/01,2027,1766/02,1986/01,1537/07,1539/01, Bashkia Tiranë”.  

KAS, gjithashtu, ktheu për plotësim kërkesat ankimore të depozituar nga Partia Aleanca Demokristiane e Shqipërisë me objekt “Kundërshtimi i vendimit nr. 260 të KZAZ-së nr.7, Bashkia Pukë, për rinumërimin dhe rivlerësimin e votive të vlefshme dhe të pavlefshme të subjekteve për këshillin, për të gjitha QV-të e KZAZ-të nr.7, Bashkia Pukë, Qarku Shkodër.

Partia Aleanca Demokristiane e Shqipërisë ka kundërshtuar edhe vendimin e KZAZ-së për miratimin e tabelës përmbledhëse të rezultateve të këshillit të bashkisë Përmet. Ajo ka kërkuar rinumërim dhe rivlerësim të votave për të gjithë QV-të e KZAZ-të, Bashkia Përmet. Por edhe ky subjekt duhet të plotësojë dokumentacionin e nevojshëm.

Ndërkaq, KAS ka vendosur kalimin për shqyrtim të kërkesës ankimore “Partia Lëvizja e Legalitetit” me objekt “Shpalljen të pavlefshme të zgjedhjeve në QV nr. 1100 dhe 1575, në Bashkinë Dibër. Shqyrtimi i kërkesës do të bëhet nesër në seancë publike.

/rtsh.al/