Kandidati i koalicionit “Bashkë Fitojmë” për Bashkinë e Tiranës, Belind Këlliçi në takim me banorët e zonës së Laprakës tha se programi i tij parashikon dëmshpërbimin e pronës sipas vlerës së tregut.

Këlliçi tha për shkak të ndërtimit të Unazës së Re por edhe të projekteve të rindërtimit, shumë banorë kanë humbur pronën e tyre, ndërsa nga bashkia e Tiranës nuk janë dëmshpërblyer.

“Çdo shtëpi që është prishur në Njësinë Nr.11 nga projektet e infrastrukturës, të rindërtimit, do të dëmshpërblet një për një në mënyrë të drejtë me metra katror, dhe me çmimin e tregut.”

 Këlliçi tha se në rast të fitores së zgjedhjeve nuk do të lejoë zbatimin e idesë së hedhur nga përfaqësues të qeverisë për shembje të pallateve të ndërtuara prej 50 vitesh.

Asnjë pallat i vjetër nuk do të prishet, madje do të ndërhyjmë për të bërë të mundur veshjen e pallateve me kapot, për të kursyer energjinë. Ky është një premtim që e jap para jush, nuk do t`i preket prona asnjë qytetari, asnjë familje.”

Sa i takon çështjes së ujit të pijshëm Këlliçi u zotua që pas 14 majit do të punojë që në Tiranë të arrihet furnizimi i qytetarëve deri në 17 orë në ditë.

Gazetare: Anisa Kadesha

/rtsh/