Kryeministri i Kosovës ka bërë të ditur në një konferencë për media se mbledhja e dy qeverive shqiptare, e parashikuar të zhvillohej në Shkodër në 25 Shtator, është shtyrë për datën 2 Tetor. Hoti tha se për këtë është dakortësuar edhe me Kryeministrin shqiptar Edi Rama. Sipas tij shtyrja e datës të kësaj mbledhje, ndodhi sepse seanca e radhës së Kuvendit të Kosovës është shumë e rëndësishme të premten dhe nevojitet prania e kabinetit qeveritar.

Pjesë e disktutimit në mbledhjen e dy qeverive shqiptare do të jetë edhe projekti hekurudhor Prishtinë-Durrës.

Hoti ka bërë të ditur se duhet të bëhet studimi i fizibiliteti dhe opsioni se nga do të vijë kjo linjë hekurudhore. Ai ndërkaq foli edhe për katër liritë e lëvizjes apo atë që njihet si mini-Shengeni ballkanik. Shefi i ekzekutivit edhe njëherë tha se Kosova i ka kryer kompromiset sa i përket çështjes që lidhet me dialogun dhe bisedimet me Serbinë.