Me buxhetin 2022 do të vijojë financimi i bonusin e bebes  për çdo të porsalindur. Përmes një postimi në rrjetin social “Facebook” Kryeministri Edi Rama ka bërë me dije se gjatë vitit 2021 kanë ardhur në jetë 36 238 fëmijë të cilët kanë marrë bonusin e bebes të mbështetur nga programi i mbrojtjes sociale. “Mbi 108 mijë fëmijë të lindur nga 2019, vit kur nisi programi universal i qeverisë, kanë përfituar nga mbështetja direkte e programit të mbrojtjes sociale, 40,000 lek për fëmijën e parë, 80,000 për fëmijën e dytë dhe 120,000 për fëmijën e tretë”, tha zoti Rama.
Bonusi i bebes është një politikë e re sociale që po zbatohet nga qeveria prej 1 janarit 2019 dhe mbështet familjet e reja, pavarësisht statusit social-ekonomik.
Bonusi përfitohet për të gjithë fëmijët e regjistruar në Shqipëri, pa dallim nëse kanë lindur këtu apo jashtë vendit.
Prindërit e fëmijëve të sapolindur e tërheqin çekun e bebes në maternitetin ku ndodhen duke kryer regjistrimin e menjëhershëm të fëmijës, duke shmangur të gjitha vonesat dhe burokracitë që kanë ndodhur më parë.