Zv.kryeministrja Belinda Balluku, njëkohësisht edhe drejtuese politike e Qarkut të Fierit, në një prononcim për RTSH nga KZAZ në Fier, deklaroi se socialistët në këtë qark jo vetëm arritën objektivat që i kishin vënë vetes për numrin e mandateve, por rezultati i arritur tashmë e ka tejkaluar pritshmërinë.

Sipas saj, PS po shkon drejt mandatit të 12-të në këtë qark, por, gjithsesi, sipas saj, ende mandati i 12-të është i brishtë, duke pasur parasysh që vetë sistemi zgjedhor, pra mënyra si është votuar apo si llogariten mandatet, e bën shumë të brishtë për një mandat të fundit për PS, e aq më pak për një të ri për ndonjë parti tjetër.

“Me këto shifra që kemi, pra ne jemi në 65%, PD është nën 25%. Padyshim që e kemi mandatin e 12-të, por janë për t’u numëruar edhe 235 kuti. Na duhet që të presim përfundimin e numërimit. Qarku i Fierit ka 537 kuti. Në përfundim do të dimë nëse e kemi mandatin e 12-të apo jo. Theksoj që objektivi ynë fillimisht ka qenë mandati i 10-të, dhe më pas, duke parë gjithë punën në terren, dëshironim mandatin e 11-të. Kjo votë vjen për Edi Ramën, për PS-në dhe gjithçka që ne kemi transmetuar te njerëzit dhe gjithçka që kemi bërë ndër vite. Është një votë që vjen nga të gjithë qytetarët e qarkut. Ishte një ëndërr për mua, për një mandat të 12-të. Në përgjithësi, procesi ka shkuar i qetë”, tha Balluku.

/rtsh.al/