Ndërhyrjet në kanalet e vaditjes kanë qenë intensive këtë sezon vere nga Bashkia e Gjirokastrës.

Sipas Iljaz Memushit, drejtor i Pyjeve, Kullotave, Ujitjes dhe Kullimit, është bërë e mundur sigurimi i ujitjes së tokave bujqësore, ndërsa po bëhen përgatitjet edhe për ndërhyrjet në kanalet kulluese.

“Janë bërë rreth 54 km linja kanalesh vaditëse. Aktualisht edhe po doli ndonjë problematikë gjatë sezonit të vaditjes, do të jemi aty për ta eliminuar. Zona më problematike është ajo e Cepos, e cila mbahet gjithmonë nën vëzhgim, sepse ujitet nga përroi. Në qoftë se do të respektojnë radhën e njëri-tjetrit atëherë çdo furnizim i secilës parcelë është më i kollajtë,” thotë z. Memushi.

Ai u bën thirrje fermerëve që të shlyejnë detyrimet e tyre për taksën e ujitjes.

“Aktualisht janë bërë mbledhjet e taksave në mënyrë periodike, çdo muaj. Unë u bëj një thirrje që të mos hezitojnë, sepse shërbimin e kanë pasur dhe detyrimin duhet ta derdhin,” shprehet drejtori Memushi.

Falë ndërhyrjeve dhe investimeve të vazhdueshme ndër vite, ky sistem është mbajtur në gjendje funksionale dhe ka luajtur një rol të rëndësishëm në zhvillimin e bujqësisë në zonë.

Gazetare: Leonida Koçiu

/rtsh.al/