Bordi i Entit Rregullator të Energjisë (ERE) miratoi sot një vendim thelbësor që ndikon drejtpërdrejt në kostot operacionale të stacioneve publike dhe private të karikimit të makinave elektrike. Vendimi vendos një tarifë të re dhe të diferencuar për energjinë elektrike të përdorur nga pikat dhe stacionet me fuqi të instaluar mbi 11 kW, të lidhura në nivelin e tensionit 0.4 kV.

Sipas vendimit të ERE-s, i cili hyn në fuqi më 1 Nëntor 2025, do të aplikohen këto çmime të shitjes së energjisë:

Tarifa Normale: 22 lekë për kWh.

Tarifa në Orarin e Pikut: 25.3 lekë për kWh.

Pse po vendoset një tarifë e re?

ERE argumenton se kjo kategori e re konsumatorësh (stacionet e karikimit) ka ndikuar ndjeshëm në rritjen e konsumit të përgjithshëm të energjisë dhe ka shkaktuar kosto shtesë të disbalancave në rrjetin elektrik, për shkak të përhapjes së shpejtë të automjeteve elektrike dhe pikave të tyre të karikimit.

Diferencimi i çmimit në varësi të orarit synon të reflektojë koston reale të furnizimit, duke pasur parasysh ngarkesën më të madhe në rrjet gjatë periudhave të caktuara të ditës, dhe njëkohësisht të nxisë përdorimin më të ekuilibruar të energjisë nga operatorët e stacioneve të karikimit gjatë 24 orëve.

Fashat orar të pikut

Orari i pikut, ku do të aplikohet çmimi më i lartë prej 25.3 lekë/kWh, do të ndryshojë sipas stinës:

Periudha 1 Nëntor – 31 Mars (Dimër): Ora 18:00 deri në 22:00.

Periudha 1 Prill – 31 Tetor (Verë): Ora 19:00 deri në 23:00.

Kjo masë rregullatore pritet të sjellë ndryshime në strategjitë e operimit të bizneseve që administrojnë stacionet e karikimit, si dhe mund të ndikojë në çmimin final që paguajnë drejtuesit e automjeteve elektrike në pikat publike.

/rtsh.al/