Pas dy vitesh heshtjeje dhe festimesh të anulluara për shkak të luftës në Gaza, Betlehemi, qyteti ku kristianët besojnë se lindi Jezusi ndezi sërish pemën e madhe të Krishtlindjes para Kishës së Lindjes. Ndriçimi simbolik u bë pas armëpushimit të fundit dhe u përjetua si një moment shprese në një periudhë të vështirë.

Kryetari i Bashkisë, Maher Canawati, tha se vendimi për të rikthyer festimet ishte i vështirë, teksa dhimbja në Gaza vazhdon, madje edhe për komunitetin e vogël të krishterë atje, që shpesh ka familjarë në Betlehem. “Ka pasur dy vite të këqija heshtjeje. Por Krishtlindja nuk duhet kurrë të shuhet, është drita jonë e shpresës,” u shpreh ai.

Sheshi i Graxhdës u mbush me banorë vendas, të krishterë e myslimanë që bënin foto para pemës së zbukuruar me ngjyrë të kuqe dhe ari. Disa turistë të huaj, kryesisht pelegrinë, iu bashkuan festimeve, ndërsa rrugët përreth u mbushën me drita dhe pankarta të ngjarjeve festive.

Bizneset dhe hotelet, që kanë vuajtur mungesën pothuajse totale të turistëve, shpresojnë në ringritje. Por realiteti ekonomik mbetet i vështirë: papunësia ka marrë përmasa të mëdha dhe shumë familje nuk përballojnë më as ushqimet bazë. Restorantet tradicionale si Afteem thonë se kohët e fundit njerëzit nuk kanë pasur para as për falafel.

Megjithatë, të krishterët e Betlehemit thonë se pavarësisht varfërisë, do të përpiqen të festojnë sipas mundësive me përulësi, lutje dhe shpresë për paqe. Në Grotën e Lindjes, ku një yll argjendi shënon vendin e lindjes së Krishtit, pelegrinët ndezin qirinj duke u lutur për një vit më të qetë.