Këshilli i Ministrave ka miratuar një vendim, i cili zgjeron hartën e territorit të mbrojtur dhe të favorshëm për investime në kuadër të zhvillimit të ekonomisë malore në Bashkinë Shkodër. Përmes këtij vendimi, i cili ndryshon dhe plotëson vendimin paraprak të vitit 2025, territorit ekzistues i shtohen katër zona të reja me një sipërfaqe totale prej mbi 23 mijë hektarësh.

Zonat e reja dhe fshatrat që përfshihen në projekt

Vendimi i ri, i propozuar nga Ministri i Shtetit për Pushtetin Vendor dhe i nënshkruar nga Zëvendëskryeministrja Albana Koçiu, përfshin fshatra të njësive administrative Shalë, Shosh, Pult dhe Postribë:

Zona Nr. 6 (Njësia Administrative Shalë)- Përfshin fshatrat Nderlysaj, Lekaj, Gimaj, Nënmavriq, Nicaj-Shalë, Abat, Pecaj, Vuksanaj dhe Lotaj, me një sipërfaqe totale prej 4,667 hektarësh.

Zona Nr. 7 (Njësia Administrative Shosh)- Përfshin fshatrat Ndrejaj, Nikaj-Shosh, Palaj, Pepsumaj dhe Brashtë, me një sipërfaqe prej 4,458 hektarësh.

Zona Nr. 8 (Njësia Administrative Pult)- Përfshin fshatrat Pog, Kir, Gjuraj, Plan, Xhan, Bruçaj dhe Mgull, duke përbërë me 11,080 hektarë sipërfaqen më të madhe të shtuar.

Zona Nr. 9 (Njësia Administrative Postribë)- Përfshin fshatrat Drisht, Ura e Shtrenjtë, Domen dhe Prekal, me një sipërfaqe prej 3,183 hektarësh.

Për zbatimin e këtij vendimi dhe integrimin e sipërfaqeve të reja në kuadrin rregullues të ligjit “Për paketën e maleve”, janë ngarkuar tri institucione kryesore:

Ministria e Ekonomisë dhe Inovacionit;

Agjencia Shtetërore e Kadastrës;

Bashkia Shkodër.

Vendimi përcakton se përditësimi i kufijve gjeografikë bëhet zyrtarisht në bazën e të dhënave të Autoritetit Shtetëror për Informacionin Gjeohapësinor (KRGJSH) dhe hyn në fuqi menjëherë pas botimit në Fletoren Zyrtare, duke u hapur rrugë stimujve ekonomikë dhe investimeve në këto zona malore.

/rtsh.al/