Në fjalën e tij të mbajtur në Kuvend, Kryetari i Grupit Parlamentar të Partisë Socialiste, Taulant Balla, argumentoi se Reforma Administrativo-Territoriale lidhet drejtpërdrejt me procesin e integrimit të Shqipërisë në Bashkimin Evropian. Sipas tij, përballimi i detyrimeve të anëtarësimit kërkon ndryshime të thella strukturore në pushtetin vendor.

“Anëtarësimi në Bashkimin Evropian kërkon reforma të thella, kërkon reforma të vështira, ndoshta edhe jo popullore, por janë reforma që duhen bërë me çdo kusht, edhe me çdo çmim,” deklaroi Balla gjatë seancës parlamentare.

Ai vuri në dukje se rreth 70% e legjislacionit të Bashkimit Evropian gjen zbatim pikërisht në nivelin vendor, gjë që kërkon rritjen e menjëhershme të kapaciteteve administrative të bashkive shqiptare.

“Rreth 70% e legjislacionit të Bashkimit Evropian zbatohet në nivel vendor, pra duhet të kemi gati bashki që në vitin 2030 të jenë gati të fillojnë të zbatojnë legjislacionin europian në nivelin e tyre,” nënvizoi ai.

Sfidat e bashkive të vogla me fondet dhe projektet evropiane

Një pjesë e rëndësishme e argumentimit të Ballës u përqendrua te pamundësia e bashkive me përmasa të vogla për të përthithur fondet e politikës së kohezionit të BE-së. Ai solli shembuj konkretë si Prrenjasi dhe Këlcyra, duke spikatur nevojën për bashkim me njësi më të mëdha për të krijuar struktura konkurruese.

“Nuk i ka kapacitetet sot bashkia Prrenjas që të bëjë projekte që të konkurrojnë në fondin e zhvillimit rajonal evropian as për infrastrukturë, as për zhvillim urban, as inovacion. Ne duhet të kemi gati të konkurrojmë për 514 milionë euro që duhet të konkurrojnë bashkitë tona. Nuk duam të humbim asnjë qindarkë,” argumentoi Balla.

Për të ilustruar këtë, ai iu referua përvojës së vendeve të tjera të rajonit gjatë periudhës pas anëtarësimit.

“I mbaj mend mirë kur Rumania dhe Bullgaria hynë në Bashkimin Evropian, në tre vitet e para më shumë para jepnin sesa merrnin sepse nuk kishin entitete për të përgatitur projekte,” rikujtoi kreu i grupit socialist.

Financat vendore dhe replikat me opozitën

Balla iu përgjigj kritikave të opozitës mbi dështimin e pretenduar të reformës së vitit 2015, duke cituar rritjen e shpenzimeve dhe të të ardhurave të pushtetit vendor përgjatë viteve.

“Në vitin 2015 shpenzimet vendore ishin vetëm 34 miliardë lekë, sot shpenzimet vendore janë tre herë më shumë. Rreth 11.7 miliardë lekë ishin të ardhura nga taksat dhe tarifat vendore, sot janë 40.9 miliardë lekë ose katër herë më shumë,” tha ai.

Duke ironizuar propozimin e opozitës për krijimin e 100 njësive vendore, Balla pretendoi se vetë kundërshtarët politikë e pranojnë se rikthimi te modeli i vjetër me 373 komuna e bashki nuk është më funksional.

“Ju vetë nuk erdhët me një propozim për të shkuar te 373 njësi, por keni ardhur me një propozim prej 100 njësish. Sipas matematikës së Lulit, kjo 100 njësi është shumë më pranë 61 sesa 373,” deklaroi ai.

Në përmbyllje, Balla nënvizoi se fokusi kryesor i reformës mbetet përmirësimi i shërbimeve dhe financimit për qytetarët, e jo interesat politike apo karriget e drejtuesve vendorë.

“Qytetarët nuk duan një karrige për kryetarin e bashkisë; qytetarët duan punë dhe për punë duhen fonde, dhe e gjithë kjo bëhet për të garantuar më shumë fonde për bashkitë tona,” përfundoi Balla.

/rtsh.al/