Një aksident rrugor ka ndodhur pak më parë në aksin Kardhiq-Delvinë, ku një maune ka dalë nga rruga dhe është përmbysur. Ngjarja ka krijuar vështirësi në lëvizjen e mjeteve në këtë segment rrugor.

“Një maune është përmbysur në aksin rrugor Kardhiq-Delvinë. Ngjarja ka ndodhur pak më parë, ndërsa ende nuk dihen rrethanat e aksidentit,” bëhet e ditur nga raportimet e para të RTSH-24 nga vendngjarja.

Pasi janë njoftuar për ngjarjen, shërbimet e Policisë Rrugore kanë mbërritur në vendin e aksidentit për të marrë masat e nevojshme për menaxhimin e trafikut dhe hetimin e shkaqeve.

“Policia ka shkuar në vendngjarje dhe po punojnë për menaxhimin e situatës dhe normalizimin e qarkullimit,” njoftohet nga terreni.

Deri më tani nuk ka një konfirmim zyrtar lidhur me gjendjen shëndetësore të drejtuesit të mjetit apo personave të tjerë të mundshëm të lënduar.

“Ende nuk ka informacion të konfirmuar për persona të lënduar. Policia po punon për zbardhjen e shkaqeve të aksidentit,” theksohet në raportimin e RTSH-24.

/rtsh.al/