Ministrja e Shëndetësisë, Klodiana Spahiu, ka zhvilluar një bashkëbisedim me studentët që po kryejnë praktikën profesionale në Spitalin Universitar Obstetrik-Gjinekologjik “Koço Gliozheni”.

Gjatë takimit, ministrja është njohur nga afër me përvojën e studentëve në mjedisin spitalor, sfidat me të cilat përballen gjatë praktikës, si dhe kërkesat dhe pritshmëritë e tyre për të ardhmen profesionale.

Përmes një reagimi, Spahiu theksoi rëndësinë e komunikimit të drejtpërdrejtë me studentët, dëgjimit të shqetësimeve të tyre dhe përmirësimit të kushteve në të cilat zhvillojnë praktikën profesionale.

Sipas ministres, krijimi i një mjedisi mbështetës është i rëndësishëm për formimin e tyre dhe përgatitjen si profesionistë të ardhshëm të shëndetësisë.

Ajo vlerësoi gjithashtu të rinjtë që zgjedhin profesionet shëndetësore, duke i cilësuar si një investim të rëndësishëm për të ardhmen e sistemit shëndetësor.

Spahiu nënvizoi se përvoja, njohuritë dhe përkushtimi i tyre duhet të mbështeten, në mënyrë që në të ardhmen të kontribuojnë në ofrimin e shërbimeve shëndetësore në të gjithë vendin, veçanërisht në zonat ku nevoja për profesionistë të kualifikuar është më e madhe.

/rtsh.al/