Policia e Tiranës prangosi të shtunën gjashtëmbëdhjetë persona dhe shpalli në kërkim dy të tjerë, pasi në bashkëpunim me njëri-tjetrin kontrabandonin në Shqipëri ilaçe e më pas i tregëtoni në farmaci të ndryshme.

Sipas policisë së kryeqytetit, grupi prej 16 personave merrnin medikamente të ndryshme nga Greqia, Italia dhe Kosova, të cilat më pas i shisnin në farmaci të ndryshme në Tiranë, Elbasan, Fier, dhe Vlorë, me çmime shumë të larta.

Strukturat policore kanë sekuestruar medikamentet e ndryshme mjekësore, me vlerë rreth 50.000€ ndërsa hetimet për këtë aktivitet të paligjshëm kishin nisur prej muajsh.

Gjatë kontrolleve të ushtruara në kuadër të këtij operacioni, në disa banesa dhe farmaci në Tiranë, Elbasan, Fier dhe Vlorë, shërbimet e Policisë u gjetën dhe sekuestruan sasi të konsiderueshme medikamentesh mjekësore, pa pullë fiskale nga Agjencia Kombëtare e Barnave dhe Pajisjeve Mjekësore.

Policia tha se, materialet i kaluan Prokurorisë, për veprime të mëtejshme procedurale.

Gazetare Flutura Tota

/ rtsh.al /