Një Gjykatë Apeli në SHBA hodhi poshtë pretendimet e Donald Tramp se imuniteti presidencial e mbron atë nga përgjegjësia në paditë e ngritura ndaj tij nga ligjvënësit demokratë dhe oficerët e policisë në lidhje me trazirat e 6 janarit 2021 në ndërtesën e Kongresit amerikan.

Megjithatë, gjykata ka thënë se vendimi i saj nuk është fjala e fundit për çështjen e imunitetit presidencial, duke i lënë hapur derën ish-presidentit për të vazhduar luftën për këtë çështje.

Trump, që kryeson garën për t’u nominuar kandidat për president nga radhët e republikanëve për zgjedhjet presidenciale të vitit 2024 thotë ai nuk mund të paditet për trazirat e 6 janarit 2021. Ai argumentoi, se fjalimi i tij gjatë tubimit, para se njerëzit të sulmonin godinën e Kapitol dhe të shkaktonin trazira,  adresoi çështje me interes publik dhe deklaratat ishin në përputhje me imunitetin e plotë presidencial.

Vendimi i gjykatës u mor në një kohë kur avokatët mbrojtës të Trump po argumentojnë se ai është imun edhe ndaj ndjekjes në një rast penal të cilin e ngriti prokurori special Jack Smith.

Trump akuzohet se tentoi të deformojë në mënyrë të jashtëligjshme rezultatitn zgjedhor kundër Xho Bajden në zgjedhjet e kaluara presidenciale. Kjo është e katërta mes çështjeve penale me të cilat Donald Trump po përballet ndërsa po tenton të rikthehet në Shtëpinë e Bardhë me zgjedhjet e vitit 2024.

/RTSH/