Cole Thomas Allen, 31-vjeçari i akuzuar për tentativën e vrasjes së Presidentit Donald Trump gjatë darkës vjetore të Shoqatës së Korrespondentëve, do të mbetet në paraburgim në pritje të gjyqit. Gjatë seancës së zhvilluar këtë të enjte në gjykatën federale, Allen nuk u deklarua fajtor për akuzat e rënda që rëndojnë mbi të, ndërsa mbrojtja dhe prokuroria shkëmbyen argumente të forta mbi dinamikën e ngjarjes.

Incidenti i rëndë ndodhi fundjavën e kaluar në hotelin “Washington Hilton”, ku Allen u kap duke kaluar magnetometrat me një pistoletë të gjatë, thika dhe pajisje luftarake, duke shkaktuar kaos në një nga ngjarjet më të rëndësishme politike të kryeqytetit.

Detajet e hetimit dhe motivi

Prokurorët paraqitën prova të reja që sugjerojnë një sulm të mirëmenduar. Sipas dokumenteve të gjykatës, pak minuta para sulmit, Allen kishte bërë një fotografi të vetes në dhomën e hotelit, i pajisur me një çantë fishekësh dhe armë të ftohta.

Në mesazhet e gjetura nga autoritetet, ai e vetëquante veten një “Vrasës Federal Miqësor”, duke lënë të kuptohet se motivi i tij lidhej me pakënaqësitë ndaj veprimeve të administratës Trump. Megjithatë, avokatët mbrojtës këmbëngulin se shkrimet e tij nuk e përmendin asnjëherë presidentin me emër dhe se akuzat bazohen në spekulime.

Përplasja me shërbimin sekret

Dinamika e shkëmbimit të zjarrit mbetet pika më e nxehtë e debatit ligjor. Sipas versionit të Prokurorisë, Allen qëlloi të paktën një herë në drejtim të një agjenti të Shërbimit Sekret, duke e goditur në gjoks. Agjenti mbijetoi falë jelekut antiplumb. Si kundërpërgjigje, një agjent tjetër qëlloi pesë herë.

Avokatët pretendojnë se provat balistike janë në kundërshtim me teorinë e qeverisë dhe se akuzat për tentativë vrasjeje ndaj presidentit janë “ndërtuar mbi supozime”.

Profili i të akuzuarit

Cole Thomas Allen, me origjinë nga Torrance, Kaliforni, përshkruhet si një person me arsim të lartë, mësues privat dhe zhvillues amator videolojërash. Tashmë ai përballet me akuza që mund t’i kushtojnë burgimin e përjetshëm, përfshirë tentativën e vrasjes së presidentit dhe qitjen me armë gjatë një krimi të dhunshëm.

Gjykata ka vendosur që Allen të qëndrojë në burg për momentin, ndërsa procesi pritet të vijojë me shqyrtimin e provave teknike dhe dëshmive të agjentëve të përfshirë në ngjarje.

/rtsh.al/