Ana e Malit, në bashkinë e Shkodrës, njihet si një zonë me prodhimtari të lartë bujqësore, pavarësisht përmbytjeve të shpeshta. Fermerët kultivojnë ullinj, shegë dhe fruta të ndryshme, duke shfrytëzuar tokën pjellore dhe klimën e favorshme. Megjithatë, dëmet nga përmbytjet kanë ndikuar në prodhim dhe në të ardhura. Ata kërkojnë më shumë mbështetje, investime dhe subvencione për zhvillimin e bujqësisë.

Ndërkohë, një fshat me bukuri dhe perspektivë është Oboti në këtë njësi. Sipas banorëve, ky fshat ka një rëndësi të veçantë historike dhe gjeografike, pasi ndodhet shumë pranë kufirit me Malin e Zi. Ata kërkojnë që institucionet t’i kushtojnë më shumë vëmendje kësaj zone.

“Ka pas prodhime shumë të mira këtu dhe pse të mos jetë dhe fshati Obot pikë turistike”, u shpreh Vinçenc Gocaj, banor i fshatit Obot.

Pavarësisht sfidave të vazhdueshme nga përmbytjet, Ana e Malit mbetet një zonë me potencial të madh bujqësor.

Gazetar: M. Rakaj  

/rtsh.al/