Kryedemokrati Lulzim Basha i cili mban edhe detyrën si raporter për konfiskimin e aseteve ruse ka deklaruar se Moska me ndihmën e Beogradit po kërkon të destabilizojë rajonin e Ballkanit.

Duke folur pas takimit me Jean-Louis Bourlanges, kryetarin e Komitetit për Punët e Jashtme të parlamentit francez, Basha thekson se këto përpjekje synojnë ta zhysin Ballkanin në kaos dhe të minojnë krahun juglindor të NATO-s.

“Të tilla janë përpjekjet për destabilizim në rajon, ku synimet e Moskës me mbështetjen e aleatëve të saj në Serbi, janë zhytja e Ballkanit Perëndimor në kaos dhe minimi i arkitekturës së sigurisë së krahut juglindor të NATO-s, duke provokuar një front të ri në zemrën e Aleancës”, shkruan Basha në rrjetin e tij social.  

Biseduam gjerësisht mbi situatën e sigurisë dhe kërcënimet me të cilat po përballet Europa, ndërsa lufta e agresionit rus në Ukrainë ka hyrë në vitin e tretë.

Basha shkruan gjithashtu se teksa nesër do të zhvillohet seanca e posaçme e Komitetit Politik mbi anëtarësimin e Kosovës në Këshillin e Europës, ai ka kërkuar mbështetjen e Francës, duke “nënvizuar se Kosova anëtare e Këshillit të Europës është një garanci më shumë për ata që pretendojnë mbrojtjen e të drejtave të pakicave atje.”

Basha shpjegon se ka diskutuar me kryetarin e Komitetit për Punët e Jashtme të parlamentit francez për rezolutën për “rindërtimin e Ukrainës, ku parashikohet që Federata Ruse ka detyrimin për të kompensuar Ukrainën, qytetarët, sipërmarrjet dhe qeverinë e saj, për dëmet e shkaktuara nga aktet e saj të paligjshme. Në funksion të këtij qëllimi është edhe konfiskimi i aseteve të ngrira të Federatës Ruse dhe vendosja e tyre në mbështetje të Ukrainës”

/rtsh.al/