Kryetari i Partisë Demokratike, Lulzim Basha zhvilloi të martën një takim me Mireille Clapot, nënkryetare e Komisionit për Punët e Jashtme të parlamentit francez.

Sipas njoftimit për shtyp të PD-së, në këtë takim është diskutuar mbi situatën e sigurisë dhe zhvillimet në rajon.

“Shpreha shqetësimin për gjuhën kërcënuese të Beogradit ndaj paqes dhe sigurisë në Kosovë, por edhe në rajon, me nxitje dhe mbështetje edhe nga Moska”, tha Basha.

Kreu i PD-së kërkoi mbështetjen e Francës për anëtarësimin sa më parë të Kosovës në Këshillin e Evropës, pasi kjo, sipas tij, është edhe në interes të të drejtave të pretenduara për pakicën serbe atje.

“Ndërsa lufta në Ukrainë ka hyrë në vitin e tretë, agresiviteti i Rusisë sa vjen dhe rritet. Theksova domosdoshmërinë e mbështetjes për Ukrainën duke përdorur dhe asetet e ngrira të federatës ruse. Në funksion të kësaj është dhe Rezoluta për Rindërtimin e Ukrainës që pritet të miratohet në Asamblenë Parlamentare të Këshillit të Evropës”, shtoi Basha.

/rtsh.al/