Rajoni i Liqenit të Shkodrës po përjeton një transformim të rëndësishëm nëpërmjet dy projekteve madhore të financuara nga Bashkimi Evropian dhe Banka Evropiane për Rindërtim dhe Zhvillim (BERZH). Ndërtimi i Muzeut Kombëtar të Lundrimit dhe rikonstruksioni i rrugës lidhëse Shirokë–Zogaj–Kufiri me Malin e Zi synojnë rijetësimin e trashëgimisë historike, promovimin e ekoturizmit dhe zhvillimin e qëndrueshëm të Rezervës së Biosferës nën mbrojtjen e UNESCO-s.

Në një njoftim zyrtar në rrjetet sociale, Delegacioni i BE-së në Shqipëri vuri në pah rëndësinë e kësaj ndërhyrjeje komplekse.

“Së bashku, këto projekte nxjerrin në pah biosferën e mbrojtur nga UNESCO dhe harmonizojnë historinë, natyrën me rritjen e qëndrueshme.”, thuhet në postim.

Muzeu i ri i lundrimit, një oaz i historisë mbi lumin Buna

I pozicionuar në pikën strategjike ku bashkohen tre lumenj në hyrje të Liqenit të Shkodrës — pranë Kalanë së Rozafës — Muzeu Kombëtar i Lundrimit do të mbulojë një sipërfaqe prej mbi 2,000 metrash katrorë. Projekti synon të rikthejë kujtesën e portit të vjetër dhe pazarit të Shkodrës, që dikur e shndërruan qytetin në një nga qendrat më të rëndësishme tregtare të rajonit.

Nga pikëpamja arkitekturore, ndërtesa përfshin një tarracë verore dhe një instalacion unik në formë varke me pamje nga lumi Buna dhe kalaja.

Rruga Shirokë–Zogaj, infrastrukturë moderne përgjatë liqenit

Paralelisht, punimet për aksin rrugor Shirokë–Zogaj–Kufiri me Malin e Zi janë drejt përfundimit. Rruga e re me gjerësi totale prej 7 metrash përfshin dy korsi lëvizjeje prej 3 metrash secila, kanale kulluese, si dhe një korsi të dedikuar prej 2 metrash për këmbësorët dhe çiklistët. Kufiri i shpejtësisë do të jetë 50 km/orë (dhe 30 km/orë në segmente me terren më të thyer).

Përveç eliminimit të kthesave të rrezikshme dhe përmirësimit të sigurisë, ky aks ofron pamje panoramike mbi liqen, duke shërbyer si një urë lidhëse jo vetëm për fshatrat bregdetare, por edhe si një korridor i ri turistik me Malin e Zi.

Kuadri i financimit, 100 milionë euro për turizmin shqiptar

Këto ndërhyrje janë pjesë e një programi më të gjerë mbështetës prej 100 milionë eurosh për konkurrueshmërinë e turizmit në Shqipëri, ku BERZH kontribuon me 60 milionë euro kredi dhe BE me 40 milionë euro grante.

Programi mbulon rehabilitimin e siteve natyrore e kulturore në katër rajone kryesore (Shkodër, Berat, Fier dhe Korçë), si dhe kredi mbështetëse për ndërmarrjet e vogla e të mesme në sektorin e turizmit.

/rtsh.al/