Deputeti i Partisë Demokratike, Kreshnik Çollaku ka deklaruar në studion e RTSH24 se samiti i mbajtur sot në Malin e Zi mes Bashkimit Evropian dhe Ballkanit Perëndimor tregoi se Serbia megjithëse është për procesin e integrimit në BE sillet si një shtojcë e Rusisë në Ballkan.  

Ai theksoi se Serbia kërkon të prodhojë konflikt në Ballkan dhe për këtë shfaqet në retorikën e saj.

“Problemi kthehet në atë çfarë bëjnë. Kemi një fuqi në Ballkan si Serbia e cila edhe pse flet dhe mëton për Bashkimin Evropian sillet një shtojcë dhe një proksi i Rusisë në Ballkan. Në samitin e Evropës Qendrore para një 1 muaji në Itali, në fjalën e saj nënkryetarja e Parlamentit të Serbisë ka përmendur 23 herë fjalën luftë. Pra, retorika e saj ishte lejoni Serbinë të kryejnë punë e veta me Bosnjen dhe Kosovën, ndryshe Ballkani ka luftë”, u shpreh Çollaku.

Çollaku theksoi se Serbia po shfaqet gjithnjë e më agresive për të bllokuar Kosovën dhe bën përpjekje për konfliktin të armatosur në Kosovë nën modelin e Banjskës.

Ai shtoi se Serbia ka rrëshqitur në një aks rus dhe tani nuk po mundohet as ta fshehë.

/rtsh.al/