Tre javë pas daljes jashtë funksionit të Urgjencës polivalente në QSUT për shkak të zjarrit në katin e nëndheshëm të shërbimit të radiologjisë,  ministrja e Shëndetësisë, Albana Koçiu jep reagimin e parë në lidhje me rehabilitimin e saj.

Sipas ministres së afërmi do të nisin punimet për kthimin e strukturës në normalitet.

“Struktura e cila është dëmtuar si pasojë e incidentit që ndodhi është duke u rehabilituar, punimet do të fillojnë së shpejti dhe do mbarojnë në një kohë të shpejtë për tu kthyer në normalitet”, u shpreh ministrja.

Kjo gjë do të  mundësohet falë aktivizimit të një tjetër fondi që  pritet të akordohet nga ministria e Shëndetësisë, buxheti i shtetit.

Prokuroria e Tiranës ka njoftuar më herët nisjen e hetimeve  dhe procedimin e ka regjistruar pa persona në hetim.

Mësohet se nga organi hetimor është kërkuar administrimi i të gjitha provave për të dokumentuar shkakun, vlerën e dëmit të shkaktuar, si dhe personat përgjegjës për shkaktimin e dëmit.

Po kështu edhe nga ana e ministrisë së Shëndetësisë është ngritur një grup punë për vlerësimin e dëmit të shkaktuar.

Urgjencat po përballohen nga dy spitalet e tjerë universitare, Traumën dhe ish-Sanatoriumit dhe një pjesë e vogël nga vetë QSUT.

Gazetare: Sonila Mlloja

/rtsh.al/