Ambasadorja e SHBA-së, Yuri Kim ka zhvilluar një takim me drejtorin e Policisë së Shtetit, Muhamet Rrumbullaku. Gjatë takimit fokusi ka qenë pikërisht në forcimin e ligjit dhe rritjen e bashkëpunimit Shqipëri-SHBA në luftën ndaj krimit dhe trafikut të drogës.

Ambasadorja Kim ka theksuar gjithashtu edhe rolin e rëndësishëm që Policia e Shtetit ka në mbarëvajtjen e një procesi zgjedhor të rregullt më 14 maj.

“Ambasadorja Kim dhe Drejtori i Policisë së Shtetit Shqiptar Rrumbullaku diskutuan bashkëpunimin në rritje SHBA-Shqipëri në zbatimin e ligjit kundër rrjeteve kriminale, trafikut të drogës dhe kërcënimeve kibernetike. Ambasadorja theksoi rolin vendimtar të Policisë së Shtetit në sigurimin e një procesi të sigurt dhe të hapur në zgjedhjet e ardhshme, në përputhje me standardet ndërkombëtare dhe ligjin shqiptar”, thuhet në njoftimin e Ambasadës së SHBA-së.

Më 14 maj në Shqipëri zhvillohen zgjedhjet vendore, ku ndërkombëtarët kanë vënë theksin në një proces të rregullt, të lirë dhe në respektimin me rekomandimet e OSBE/ODIHR-it.

/rtsh.al/