Autoritetet kineze kanë nisur një hetim ndaj gjeneralit më të lartë të Ushtrisë Çlirimtare Popullore, në kuadër të spastrimit më të fundit brenda strukturave ushtarake të vendit. Ministria e Mbrojtjes njoftoi të shtunën se Zhang Youxia, një nga dy nënkryetarët e Komisionit Qendror Ushtarak, po hetohet për shkelje të dyshuara të disiplinës dhe ligjit.

Zhang Youxia, 75 vjeç, është figura më e fundit e nivelit të lartë që përfshihet në një seri hetimesh ndaj zyrtarëve ushtarakë kinezë.

Hetimet janë pjesë e fushatës së gjerë kundër korrupsionit të nisur nga Xi që prej ardhjes së tij në pushtet në vitin 2012, fushatë që ka çuar në ndëshkimin e mbi 200 mijë zyrtarëve në të gjithë vendin.

Në të njëjtën kohë, Ministria e Mbrojtjes bëri të ditur se edhe Liu Zhenli, një tjetër anëtar i Komisionit Qendror Ushtarak dhe shef i shtabit të Departamentit të Shtabit të Përbashkët, është vënë nën hetim nga Partia Komuniste e Kinës. Detaje mbi shkeljet e dyshuara nuk janë bërë publike.

Zhang Youxia iu bashkua ushtrisë në vitin 1968 dhe ka ndërtuar karrierën e tij në forcat tokësore. Tetorin e kaluar, Partia Komuniste përjashtoi nënkryetarin tjetër të komisionit, He Weidong, i cili u zëvendësua nga Zhang Shengmin.

/rtsh.al/