Shkollat 9-vjeçare “Besëlidhja” në Lezhë, “Ismail Qemali” në Shkodër, “Bajram Curri” në Kukës dhe shkolla “Nr. 3” në Laç janë katër institucionet arsimore që do të përfaqësojnë Drejtorinë Rajonale të Arsimit Parauniversitar Lezhë në finalen e Konkursit Kombëtar të Gjuhës Shqipe.

Ceremonia e shpalljes së fituesve u organizua në Lezhë, në një aktivitet ku u vlerësua përkushtimi i nxënësve dhe mësuesve në promovimin e përdorimit të saktë dhe të pasur të gjuhës shqipe.

Drejtori i DRAP Lezhë, Hasan Muça, u shpreh për RTSH se, “të rinjtë kanë spikatur talent të jashtëzakonshëm jo vetëm në interpretim, por edhe në prezantim të projekteve që janë shumë mbresëlënëse. Qëllimi dhe mesazhi që neve duhet të përcjellim nëpërmjet këtij konkursi është që realisht nxënësit tanë të edukohen me dashuri për të bukurën, për të dlirën dhe për të pasur gjuhën tonë shqipe.”

Në edicionin e katërt të këtij konkursi morën pjesë 114 shkolla dhe 670 nxënës nga 10 zyra arsimore që përfshihen në juridiksionin e drejtorisë rajonale, e cila mbulon qarqet e Shkodrës, Kukësit dhe Lezhës.

/rtsh.al/