Ministri Mete: Ekonomia shqiptare në një moment të mirë. Turizmi, ndikim parësor

Ekonomi | 3 vite më parë

Ministri i Financave, Ervin Mete ka deklaruar në Forumin e CEO-ve të “AmCham” se ekonomia shqiptare po kalon në një moment të mirë.

Sipas tij, vlerësimi i Bankës Botërore nga Agjencisë Ndërkombëtare “Standard&Poor’s” do të shoqërohet me përfitime konkrete për ekonominë tonë.

Mete vuri në dukje se detyrimet e prapambetura në dhjetor 2023 kanë zbritur në nivelin më të ulët që nga nisja e monitorimeve nga Ministria e Financave në vitin 2016, në afro 1% të totalit të shpenzimeve.

“Ekonomia e vendit po kalon një moment të mirë dhe këtë e konfirmoi edhe Standard&Poor’s, ashtu siç kanë bërë më herët edhe institucionet financiare ndërkombëtare, Banka Botërore dhe Fondi Monetar Ndërkombëtar, duke vlerësuar qëndrueshmërinë e ekonomisë sonë, si edhe duke rishikuar në rritje parashikimet e tyre për rritjen ekonomike”, u shpreh Mete.

Ai theksoi gjithashtu se treguesit makroekonomikë janë përmirësuar ndjeshëm së bashku me pozicionin e jashtëm të Shqipërisë “falë performancës shumë të mirë të sektorit të turizmit, i cili gjatë vitin e kaluar solli afro 4.2 miliardë euro të hyra në ekonomi, me një rritje prej 47% krahasuar me vitin 2022”, ndërsa shtoi se “investimet e huaja arritën në nivelin më të lartë historik në vitin 2023, prej afro 1.5 miliardë euro, sipas të dhënave më të fundit të publikuara ditën e djeshme nga Banka e Shqipërisë”

/rtsh.al/


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme