Presidenti Ilir Meta dhe kryeministri, Edi Rama, vijojnë replikat në distancë, nëpërmjet rrjeteve sociale. Përmes një postimi në Facebook, presidenti Ilir Meta shkruan se “Rama ka ofenduar sërish dëshmorët e Atdheut”. Zoti Meta, duke e quajtur Ramën si “Esati i Rilindjes”, shkruan se numërimi mbrapsht për të ka filluar dhe nuk do ndalet deri në 25 prill.

“Esati i Rilindjes, zëdhënësi i armiqve të Kombit Shqiptar, guxoi sërish sot të marrë nëpër gojë Vojo Kushin, duke ofenduar për të disatën herë Dëshmorët e Atdheut, familjarët e tyre, veteranët dhe të gjithë shqiptarët që nderojnë dhe krenohen me vlerat e Luftës Antifashiste Nacionalçlirimtare. Esati i Rilindjes duhet ta ketë të qartë se numërimi mbrapsht për të dhe Sektin pa nder, pa vlera e pa Atdhe që përfaqëson, ka filluar dhe NUK DO NDALET”, ka shkruar Presidenti.

Pasi presidenti Meta akuzoi kryeministrin Rama se ka ofenduar dëshmorët e Atdheut, është kundërpërgjigjur ky i fundit. Përmes një statusi në Facebook, Rama i shkruan Kreut të Shtetit, duke iu drejtuar me fjalët: “Ilir, ti duhet ta kuptosh se nuk ka pasur para teje dhe nuk do ketë pas teje, as principatë, as monarki, as republikë në botë, që të ketë dhënë dekorata për heronjtë e luftrave të shkuara! Kjo është komedia e një marrëzie të pashoqe që të bën gazin e botës dhe të republikës sonë! Heronjtë mbaji në zemër e në mendje kur flet e vepron, duke respektuar detyrën e lartë e duke dhënë shembullin që detyra të imponon, jo duke sharë si i dehur me ata në gojë e duke nxitur dasi, sherr e rrëmuja për interesat e tua krejt personale dhe për partinë tënde të degraduar”. /rtsh.al