Barcelona që i sheh të gjithë nga lart në renditjen e La Liga-s nuk është diçka e re, por fakti që deri tani ka shkëlqyer me golat e Raphinha-s befason disi, duke ditur që në skuadër është Lamine Yamal. Me 12 gola në 7 ndeshje, braziliani është golashënuesi më i mirë i kampionatit, por ndryshe nga talenti spanjoll, në listën e “Topit të Artë” ai mungon.

“Lamine Yamal për mua është kandidati numër 1 për të fituar trofeun. Lamine është magjik në fushë, karizmatik dhe ka personalitet. Përveç golave, asisteve dhe trofeve, sigurisht. Është një lojtar spektakolar, e ka treguar te Barcelona dhe në kombëtare.

Janë dy skuadra, ku ai është një nga lojtarët më të rëndësishëm. Për mua nuk ka dyshime se kush duhet ta fitojë “Topin e Artë” këtë vit. Lamine ka trofetë, titullin në La Liga me Barcelonën, Botërorin me Spanjën. Ka një kualitet të jashtëzakonshëm”, – ka theksuar Raphinha në një intervistë për “Gazzetta dello Sport”.

Ai ka bërë një koment edhe për trajnerin e Brazilit, Carlo Ancelotti: “Më ka befasuar shumë. E kisha takuar si rival në Spanjë dhe më kishte lënë një shije të mirë, më dukej një njeri i respektuar. Kur fillova të punoj me të në kombëtare dhe jemi njohur më shumë, zbulova një tip të jashtëzakonshëm. Një surprizë e mrekullueshme”.