Presidenti amerikan Donald Trump ka deklaruar se udhëheqësi kinez Xi Jinping e ka siguruar se Pekini nuk do t’i dërgojë armë Iranit gjatë luftës në vazhdim.

Deklarata erdhi të martën, pas vizitës tre-ditore të Trump në Kinë javën e kaluar.

Presidenti amerikan vlerësoi disa marrëveshje tregtare, por nuk pati ndonjë përparim të madh lidhur me luftën Izrael-ShBA kundër Iranit.

Deklarata vjen edhe teksa presidenti rus Vladimir Putin mbërriti për vizitën e tij në Kinë, duke vazhduar partneritetin strategjik të gjatë mes Moskës dhe Pekinit, që prej kohësh shqetëson Uashingtonin. Rusia ka furnizuar prej vitesh me armë Iranin.

“Presidenti Xi më ka premtuar se nuk po i dërgon asnjë armë Iranit. Ky është një premtim i bukur. Unë i besoj fjalës së tij,” tha Trump para gazetarëve në një event në vendin e ndërtimit të sallës së ballo në Shtëpinë e Bardhë.

Ai shtoi se Xi dëshiron që Ngushtica e Hormuzit të mbetet e hapur “ashtu si unë”.

Trump dhe zyrtarët e tij kishin dhënë mesazhe kontradiktore para vizitës në Kinë, duke sugjeruar se shpresonin që Pekini të përdorte ndikimin e tij mbi Iranin për një armëpushim më të qëndrueshëm, por njëkohësisht duke minimizuar rëndësinë e temës në bisedat me Xi.

Të hënën, Trump tha se kishte vënë “në pritje” një sulm të planifikuar. Ai e mori vendimin me kërkesë të Katarit, Arabisë Saudite dhe Emirateve të Bashkuara Arabe, duke shtuar se “po zhvillohen negociata serioze”.

Agjencia gjysmëzyrtare iraniane Tasnim raportoi të hënën se Irani ka dorëzuar një plan të ri paqeje me 14 pika për t’i dhënë fund luftës, por detajet nuk u bënë publike menjëherë.

Trump tha të martën se ishte “vetëm një orë larg vendimit për të sulmuar sot”, por pranoi t’i japë Iranit disa “ditë” për t’u kthyer në negociata – ndoshta deri të premten, të shtunën ose të dielen.

“Ne mund të duhet t’i japim një goditje tjetër të madhe. Nuk jam i sigurt ende,” shtoi ai.

Nga ana e tij, kryetari i komisionit për sigurinë kombëtare të parlamentit iranian, Ebrahim Azizi, tha se Trump nuk udhëhiqet nga negociatat, por nga frika ndaj përgjigjes së Iranit.

Ai paralajmëroi se një sulm i ri amerikan do të përballet me “përgjigje ushtarake vendimtare dhe një komb të bashkuar”.

/rtsh.al/