Të ashtuquajturat tullumbacet me azot, që kohët e fundit janë përmendur si shkak i dëmtimeve shëndetësore tek adoelshentët, u bënë shkas për disa debate të shkurtëra në Komisionin e Ligjeve në parlament.

E ftuar në komision, zëvendësministrja e Shëndetësisë, Entela Ramosaçaj, dha shpjegime për disa ndryshime në ligjin për barnat psikotrope dhe lëndët narkotike. 

Por vemendja u zhvendos nga disa deputetë të shumicës dhe pakicës tek shqetësimi i kohëve të fundit për tullumbacet me azot.

Zyrtarja e Shëndetësisë tha se lënda për të cilën flitet kohët e fundit nuk është e ndaluar sipas konventave ndërkombëtare.

Zonja Ramosaçaj siguroi deputetët se nuk janë spitalet burimi i shpërndarjes në publik të këtij produkti, ndërsa paralajmëroi pasoja nëse përdoret në mënyrë të pakontrolluar.

BE në rekomandimet e veta i ka kërkuar Shqipërisë që të ndryshojë listën e lëndeve të ndaluara që të sigurojë hetime të mira penale në luftën kundër narkotikëve.

Gazetare: Sonila Agostini

/ rtsh.al  /