Kryetari i Bashkisë së Tiranës, Erion Veliaj ka nisur një vizitë zyrtare dy ditore në Otava të Kanadasë, përpara se të niset për në Toronto, ku do të mbajë një fjalë si i ftuar në Forumin Urban Botëror. Ai u prit dje nga komuniteti shqiptar në Otava dhe mori pjesë në çeljen e ekspozitës “Diplomart”, e realizuar nga artistët shqiptaro-kanadezë, Entela Konomi, Kastriot Dervishi dhe Altin Muciqi.

Në takimin me komunitetin shqiptar, kryebashkiaku Veliaj i falenderoi ata për mikpritjen dhe shprehu vlerësimin e tij për punën e artistëve, duke i konsideruar një vlerë të shtuar për komunitetin shqipfolës në Kanada.

“E falenderoj shumë ambasadorin sepse sot ambasada është kthyer në një shtëpi të të gjithë shqiptarëve. Fakti që këtu kemi një vatër, një strehë, një derë të hapur është një arritje shumë e madhe. Kjo ekspozitë është si një gur i hedhur që bën rrathë dhe jep shpresë, lëviz pak komunitetet, ndaj sot kam vetëm mirënjohje për të gjithë artistët tanë. Jam shumë i impresionuar për faktin se sot bashkohemi nëpërmjet artit. Ka disa njerëz që sportin e cinizmit e kanë shumë pasion dhe në fakt është një pak sport ballkanik, por unë besoj fort se një nga pasaportat tona më të mëdha e më të vyera është pasaporta e artit dhe kulturës”, tha Veliaj.

Ai shtoi se marrëdhëniet mes Kanadasë dhe Shqipërisë sot janë në ditët më të mira.

“Unë nuk besoj se kemi pasur ditë më të mira të marrëdhënieve shqiptaro-kanadeze dhe pavarësisht sportit kombëtar për t’u ankuar, duhet gjithashtu të jemi pak reflektues për të kuptuar se ne shqiptarët sot jetojmë ditët tona më të mira. Tirana vjet ishte Kryeqyteti Europian i Rinisë, këtë vit është Qyteti Europian i Sportit, dhe me shpresë vitin tjetër kemi aplikuar për të qenë Kryeqyteti i Kulturës, dhe nëse nuk e kuptojmë nga kemi ardhur dhe ku po shkojmë, atëherë sigurisht që të jesh cinik është gjëja më e thjeshtë. Por, unë besoj se gjërat ndryshojnë nga njerëzit që e hedhin atë gurin, që e përzien pak ujin, ndaj për të gjithë ata shqiptarë që e kanë nisur nga zero, që kanë përveshur mëngët dhe në vend që të bëjnë teori, thjesht i janë shtruar punës duke dhënë maksimumin e tyre, keni gjithë respektin, gjithë mirënjohjen edhe gjithë falenderimet e mia”, u shpreh kryebashkiaku.

Më tej, ai theksoi faktin se mes shqiptarëve duhet të ketë vetëm bashkim, sepse kemi një rrënjë.

“Kam frikë se, në disa rrethe në internet, është normalizuar disi me qenë kundër Tiranës, apo kundër Amerikës dhe Europës; me demek kundër ‘kolonizatorëve’, që mund të jenë Tirana, Brukseli, ose Uashingtoni. Por, kjo është një modë shumë e rrezikshme. Unë mundohem të flas me kryetarët e bashkive në Maqedoninë e Veriut, me kryetarët e bashkive në Kosovë, por kjo modë duhet dekurajuar. Shikoni pak se çfarë ndodhi në Izrael. Mund të jesh fuqia më e madhe teknologjike në Mesdhe, por kërkon gjithmonë aleancë. Kurse ne aleatët i kemi natyralë. Ne në çdo anë të kufirit kemi shqiptarë të tjerë. Të kthehet në modë mes shqiptarëve me shajt njëri-tjetrin, me i gjet cene njëri-tjetrit, është një sport shumë i rrezikshëm. Shpresoj shumë që ky bashkim dhe kjo vëllazëri që kemi këtu, të jetë frymëzim për të gjithë shqiptarët kudo që janë. Ne mund të jemi me parti të ndryshme, mund të jemi me politika të ndryshme, mund të jemi me lokacione të ndryshme, sepse jemi në zona të ndryshme gjeografike, por nuk mund të harrojmë që sistemi ynë i vlerave është i njëjtë, emëruesi ynë i përbashkët, kemi një rrënjë shqiptare”, tha Veliaj.

Kryetari i Bashkisë së Tiranës, Erion Veliaj, takon kryetarin e Bashkise se Otavës: “Bashkëpunim kulturor mes dy qyteteve; Forcojmë edhe më shumë lidhjen mes komuniteteve”

Gjatë vizitës së tij dy ditore në Kanada, kryetari i Bashkisë së Tiranës, Erion Veliaj, u mirëprit në një takim nga homologu i tij, kryetari i Bashkisë së Otavës, Mark Sutcliffe. Kryebashkiakët biseduan për një kalendar kulturor të përbashkët mes dy qyteteve, për të përforcuar edhe më shumë lidhjen mes dy komuniteteve.

“Ura që lidh Otavën me Tiranën dhe Otavën me Shqipërinë janë burimet njerëzore, është humanizmi i atyre që kanë krijuar histori suksesi, si në Mesdhe, ashtu edhe këtu, në Amerikën e Veriut. Jam vërtet mirënjohës dhe ndoshta, në të ardhmen, ne të kemi një kalendar të përbashkët. Tirana vjet ka qenë Kryeqyteti Europian i Rinisë, sivjet Qyteti Europian i Sportit. Ndërkohë që, vitin tjetër kemi aplikuar të jemi Kryeqyteti Mesdhetar i Kulturës. Do të ishte ideale nëse do të kemi një kalendar kulturor të përbashkët, ku artistët më të mirë nga Shqipëria dhe Kanadaja, nga Tirana dhe Otava, si dy kryeqytetet respektive, të mund të shkëmbenin dhe të forcojmë këtë lidhjen mes njerëzve”, u shpreh Veliaj.

Kreu i Bashkisë falenderoi homologun e tij për mbështetjen që ky i fundit u ka dhënë shqiptarëve që jetojnë në Otava.

“Otava është një vend dhe hapësirë e jashtëzakonshme, ku komuniteti shqiptar ka ndërtuar një shtëpi, ka ndërtuar një karrierë, kanë bërë biznes, kanë shkëlqyer në universitete. Shumë prej shqiptarëve që kanë ardhur këtu, kanë ardhur në vite shumë të vështira, pas komunizmit, një tranzicion i jashtëzakonshëm. Fakti që sot janë një histori suksesi, jo vetëm në qytetin tuaj, por edhe të kombit tonë, dhe fakti që sot janë një urë lidhëse mes dy vendeve, jam shumë mirënjohës për gjithë punën që bën ambasada jonë, punën që bën Ministria e Jashtme”, tha Veliaj.

Kryetari i Bashkisë së Otavës, Mark Sutcliffe, tha se ndihet i nderuar për vizitën e kryebashkiakut Veliaj në Kanada, ndërsa shprehu dëshirën për të vizituar së shpejti Tiranën.

“Ishte një kënaqësi t’ju mirëprisnim këtu dhe të mësonim rreth Tiranës. Shpresoj që ju të keni një vizitë të këndshme në Kanada. Kemi shumë të përbashkëta midis qyteteve dhe vendeve tona dhe mendoj që ka një miqësi të madhe mes nesh. Mezi presim që t’ju vizitojmë një ditë në Tiranë”, tha kryebashkiaku Sutcliffe.

/rtsh.al/