Sekretari i Përgjithshëm i PD-së, Enkeljd Alibeaj ka vlerësuar faktin që SPAK ka thirrur për të dhënë shpjegime kryetarin e Bashkisë së Tiranës, Erjon Veliaj.

Nëpërmjet një postimi në platformat sociale, Alibeaj shprehet se përditë shqiptarët po shohin njerëzit kryesorë dhe bashkëpunëtorët e ngushtë të Edi Ramës të kalojnë orë të tëra brenda dyerve të SPAK-ut.

“Sot ishte radha e krye-bashkiakut të aferës korruptive të inceneratorëve dhe të 5D, Erjon Veliaj. Edhe pse u mundua të fshihej pas propagandës bajate, përfshirja e tij në aferën e inceneratorëve është tashmë një çështje që po hetohet.”, shkruan Alibeaj.

Sekretari i Përgjithshëm i PD-së, ka inkurajuar SPAK-un që të vijojë punën e tij për vendosjen përpara drejtësisë të gjithë zyrtarëve të shtetit të përfshirë jo vetëm në aferën e incineratorëve, por edhe në të gjithë çështjet që janë në hetim.

“Drejtësia do të vendosë, herët a vonë”, mbyll postimin Alibeaj.

/rtsh.al/