Kryeministri i Greqisë, Kyriakos Mitsotakis, ka komentuar rrugën që do të ndjekë Shqipëria dhe Greqia, për të zgjidhur mosmarrëveshjen për kufirin detar. Sipas kryeministrit grek, “kjo ishte mënyra se si shtetet serioze dhe të përgjegjshme, zgjidhin mosmarrëveshjet e tyre”. Shqipëria dhe Greqia do t’i drejtohen Gjykatës së Hagës për zgjidhjen e mosmarrëveshjeve për çështjen e kufirit detar në Detin Jon.
Lajmi, për këto komente, u bë publik nga mediat greke dhe i referohen një deklarate të kryeministrit Mitsotakis, pas një takimi me presidentin qipriot, Nicos Anastasiades, dhe atë egjiptian, Fatah al Sisi në Nikozia.

“Kemi rënë dakord që, meqenëse nuk mund të zgjidhim mosmarrëveshjet tona rreth caktimit të kufijve të Zonave Detare, jemi të gatshëm t’i drejtohemi Gjykatës Ndërkombëtare të Drejtësisë. Kjo është mënyra se si shtetet serioze dhe të përgjegjshme zgjidhin mosmarrëveshjet e tyre” citohet zoti Mitsotakis. /rtsh.al