Shtëpia e At Gjergj Fishtës ka hapur dyert për të gjithë ata që dëshirojnë që ta vizitojnë. Sot ishte në një lidhje live nga Fishta, Lezhë, me emisionin “Shqipëria Live” Ornela Ndoka, pasardhëse e At Gjergj Fishtës. Për Ornelën është e rëndësishme që shtëpia të qëndrojë e hapur për vizitorët. Ajo ka kontribuar në restaurimin e shtëpisë, në mënyrë që të mos zhduket historia dhe gjurmët e një prej personaliteteve më të shquara të kombit shqiptar.

“Më vjen mirë që biznesmenët e kësaj zone, kanë vendosur që të hapin dyert e kësaj shtëpie. Ka qenë e banuar disa vite më parë dhe e kanë dhuruar për të qenë një shtëpi muze. Çdo gjë është bërë në mënyrë private, pasi edhe pjesa e rikonstruksionit është bërë nga një firmë private”, tregoi Ornela fillimisht në lidhje me mënyrën se si u hap kjo shtëpi.

Më pas stërmbesa e At Gjergj Fishtës u shpreh se ka shumë gjëra të tij, që nga botimet e ndryshme e deri te librat dhe pikturat që kanë dërguar vizitorët.

“Kam gjithashtu edhe një objekt personal të tij, vëllimin e parë të Lahutës së Malsisë”. Ai ia ka lënë stërgjyshit tim, Mark Fishtës (nipi i tij). Madje në këtë vëllim ka edhe shënime të shkruara nga dora e tij. Librin e ka nisur në vitin 1905 dhe e ka përfunduar në 1937”, tregoi Ornela.