Kryeministri Edi Rama ka shprehur ngushëllimet për ndarjen nga jeta të legjendës së futbollit gjerman, Franz Beckenbauer.

Rama e ka cilësuar “Kaiser Franz” si një valltar i dalë nga koreografitë e mjeshtreve të baletit modern në qendrën e mbrojtjes gjermane.

Në postimin e tij Kryeministri Edi Rama shkruan, “Kaiser Franz ishte si një valltar i dalë nga koreografitë e mjeshtrave të baletit modern në qendrën e mbrojtjes së Gjermanisë, ku ngriti kupën e botës e më pas, si një personazh i letërsisë gjermane në këmbë përpara stolit të Bundesmanschaft-it, kur e udhëhoqi Gjermaninë drejt një tjetër Kupe të Botës”.

“Me ikjen e tij shuhet një tjetër legjendë e gjallë e sportit më të dashur në botë dhe shkëputet një tjetër copë e bukur e fëmijërisë sonë, atëherë kur futbolli ndërkombëtar ishte vetë bota në Shqipërinë e burgosur brenda mureve të komunizmit”, përfundon dedikimin e tij të ndjerë Kryeministri Rama.

/rtsh.al/