Kryeministrja italiane Giorgia Meloni duke folur në samitin për Ballkanin Perëndimor në Bruksel ka deklaruar midis të tjerave se Italia është optimiste për ecurinë dhe zbatimin e marrëveshjes me Shqipërinë për pritjen e emigrantëve.

Duke u ndalur te emigracioni Meloni shpjegoi se parashikohet që Shqipëria të ngrejë dy qendra italiane për menaxhimin e emigrantëve në territorin e saj.

“Jam optimiste se nuk ekziston rreziku i dështimit të marrëveshjes me Shqipërinë për Qendrat e Riatdhesimit (CPR)”, deklaroi Meloni, ndërsa shtoi se “respektoj vendimet e një kombi sovran”, duke iu referuar qëndrimeve të ndryshme që janë shprehur në Shqipëri pasi Partia Demokratike e dërgoi këtë çështje në Gjykatën Kushtetuese.

Nga ana e saj, Gjykata Kushtetuese pezulloi ratifikimin e marrëveshjes pak ditë më parë pas dy ankesave të Partisë Demokratike të cilat nënvizonin antikushtetutshmërinë e kësaj marrëveshjeje.

Gjithashtu edhe Bashkimi Evropian ka shpjeguar se marrëveshja midis dy vendeve është jashtë ligjit evropian.

Megjithatë, kryeministrja italiane Georgia Meloni beson se nuk do të ketë nevojë për një plan B për sa kohë është një marrëveshje me Shqipërinë për të cilin ajo shprehet besimplotë se do të realizohet, transmeton EuroNews. 

“Do të shohim se çfarë do të ndodhë në javët e ardhshme dhe nëse gjithçka shkon mirë, ne do të bëjmë çmos në javët e ardhshme që ta përshpejtuar edhe më tej. Tani për tani nuk kemi nevojë për një plan B, por do të kërkojmë një të tillë nëse është e nevojshme”, shpjegoi Meloni.

/rtsh.al/