Ndërsa 1 Tetori shënon Ditën Ndërkombëtare e të Moshuarëve Kryetari Partisë së Lirisë Ilir Meta ka sjellë në vëmendje disa shqetësime lidhur me këtë grupmoshë. Në një postim në Facebook Meta shkruan se rritja e kostos së jetesës ka prekur më së shumti të moshuarit pasi sipas tij pensionet e ulëta janë të pamjaftueshme për të përballuar rritjen e çmimeve të produkteve ushqimore, aq më tepër të medikamenteve apo shpenzimeve mjekësore.

Për Metën rritja e pensioneve është një detyrim madhor për brezin e moshës së tretë.

“Qëllimi i kësaj dite për të rritur sensibilizimin për më shumë përkujdesje për personat e moshës së tretë, ka një rëndësi akoma dhe më të madhe për vendin tonë këtë vit, pasi të moshuarit në Shqipëri janë ata që po goditen më shumë nga rritja e kostos së jetesës.

Pensionet e ulëta janë të pamjaftueshme për të përballuar rritjen e çmimeve të produkteve ushqimore, aq më tepër të medikamenteve apo shpenzimeve mjekësore.Personat e grupmoshës së tretë janë më të rrezikuarit për të përfunduar drejt varfërisë ekstreme si rezultat i kësaj situate të vështirë.

Të moshuarit në Shqipëri meritojnë një trajtim dinjitoz dhe jo paketa lëmoshe dhe qesharake të Qeverisë për përballimin e krizës së çmimeve.Rritja e pensioneve është një detyrim madhor për brezin e moshës së tretë”, shkruan Meta.

/rtsh.al/