Lulzim Basha dhe Edi Rama, kanë qenë sot në qendër të kritikave të kreut të Partisë së Lirisë, Ilir Meta, në një takim në Tiranë me strukturat e kësaj force politike. Në këtë takim Meta ka folur dhe për çështjen e lobimit rus, si dhe deklaratën e zyrtarit amerikan se “Rusia i ka dhënë 500 mijë USD PD-së në vitin 2017”. Ai deklaroi se kjo aferë u përdor për të krijuar modelin rus të qeverisë dhe kapjes së shtetit, “siç është sot modeli i Edi Ramës”.

“Takohemi sot pasi vetëm pak muaj na ndajnë nga rikthimi i bashkive në duart e qytetarëve të Shqipërisë, si dhe nga rikthimi i bashkisë së Tiranës në dorën e qytetarëve të Tiranës. Edhe pak muaj për t’i dhënë fund marrëzisë së Lulushit që i fali gjithë bashkitë dhe këshillat e Shqipërisë, Edi Ramës. Nuk është thjesht problemi i parave nëse ishin ruse apo nuk ishin ruse. Atë ta zgjidhin amerikanët dhe ta sqarojë edhe PD që është cënuar padrejtësisht nga një veprim i tillë se është një parti properëndimore dhe kombëtare. Problemi është se u përdor kjo aferë për të krijuar modelin rus të qeverisë dhe kapjes së shtetit, siç është sot modeli i Edi Ramës. U përdor një aferë që të bojkotonte opozita Reformën në Drejtësi, që ta kapte Rama. U përdor një aferë për të provokuar opozitën për t’ia lënë parlamentin dhe institucionet e pavarura, Edi Ramës. Ishte pikërisht kjo aferë, që I’a fali të gjitha bashkitë dhe këshillat bashkiakë Edi Ramës, që të bëjë si i do qejfi në Tiranë dhe gjithë Shqipërinë. Kjo kohë përfundoi, ndaj Edi Ramës i është futur frika në palcë”, deklaroi Meta.

/rtsh.al/