Kryeministri Edi Rama, u shfaq sot së bashku me kryebashkiakun Erjon Veliaj në zonën e Zall-Herrit, për të inauguruar shtëpinë e një familjeje që u dëmtua nga tërmeti. Kryeministri doli kundër gjobës së vendosur nga ana e KQZ ndaj kryebashkiakut të Tiranës të vendosur disa ditë më parë.

Sipas tij, puna për rindërtimin nuk mund të quhet propagandë, por është detyrë parësore e kësaj mazhorance për t’iu gjendur sa më pranë njerëzve më në nevojë sot, familjeve që kanë humbur shtëpitë nga tërmeti i 26 Nëntorit 2019.

“Gjoba do sqarohet sepse këto s’janë inaugurime. Ne vijmë këtu që të tjerët të shikojnë se puna po vazhdon dhe që njerëzit po futen nëpër shtëpitë e tyre. Por, këta nuk kanë si ta kuptojnë këtë punë. Kjo do sqarohet se nuk është as propagandë, as inaugurim, por pjesë e informimit të të tjerëve, se ka akoma njerëz që janë në çadër, kabina dhe me qira, të cilët presin apartamentet dhe duhet t’i mbajmë me informacion, t’ju tregojmë çfarë është bërë dhe çfarë po bëhet që njerëzit të shohin realitetin”, u shpreh Rama.