Kryetari i Demokracisë së Re Serbe (NSD) dhe një nga liderët e koalicionit Për Ardhmërinë e Malit të Zi (ZBCG), Andrija Mandiq u zgjodh kryetar i Parlamentit të Malit të Zi.

Mandiq u zgjodh në vazhdimin e seancës konstituive të Kuvendit nga korriku. Në votimin e fshehtë, 49 deputetë votuan për zgjedhjen e Mandiqit, ndërsa asnjë votë kundër.

Në votim nuk morën pjesë deputetët e Partisë Demokratike të Socialistëve, Partisë Boshnjake, Socialdemokratëve, Partisë Liberale, Bashkimit Demokratik të Shqiptarëve, Iniciativës Qytetare Kroate dhe Lëvizjes Qytetare URA.

Mandiq pas diskutimit në seancën e Kuvendit tha se misioni i tij është të pajtojë Malin e Zi.

“Ky është debati më i gjatë për kandidatin për kryetar të Kuvendit dhe nuk më kujtohet që në këtë parlament të jenë bërë ofendime ndaj ndonjë individi, e jo deputetit që ka më shumë përvojë”, tha Mandiq.

Pozita e kryetarit të Kuvendit i takonte koalicionit Për Ardhmërinë e Malit të Zi sipas marrëveshjes së nënshkruar më herët nga përbërësit e qeverisë së re.

Koalicioni për Ardhmërinë e Malit të Zi, nga ana e tij, u zotua të mbështesë zgjedhjen e Qeverisë së Milojko Spajiqit, në të cilën ai do të hyjë zyrtarisht.

Pritet që Mandiq pas zgjedhjes për Kryetar të Parlamentit të caktojë seancën e re të Kuvendit për sot, në të cilën do të zgjidhet Qeveria e 44-të e Malit të Zi.

Parlamenti malazez i ka 81 deputetë.

Deputetët e Partisë Demokratike të Socialistëve në opozitë u larguan nga salla para votimit. Ata lidhën një fjongo të zezë në mikrofon në emër të, siç thanë, ditës së zezë për demokracinë në Mal të Zi.

/rtsh.al/