Alpet shqiptare në tërësi e veçanërisht Valbona, po kthehen në destinacione të lakmueshme për turizmin elitar. Në këtë kontekst bashkia e Tropojës ka nisur përgatitjeje për të pasur një sezon sa më të mbarë turistik.

Kryetari i Bashkisë Rexh Biberaj tha se turizmi në alpe po kthehet me frekuentim të plotë përgjatë gjithë vitit duke mos e ndarë në turizëm verior apo dimëror, ndaj shpreson që këtë vit numri i turistëve të kaloj 250 mijë.

Biberaj tha se është punuar e po punohet me qeverinë shqiptare  me biznesin vendas dhe operatorët për të krijuar klimë të favorshme për thithjen e turistëve. Sipas tij dy problemet akute për luginën e Valbonës, energjia elektrike dhe trajtimi i ujërave të zeza janë vënë në rrugën e zgjidhjes.

Duke qenë vend ndërkufitar me alpet që shtrihen në trekëndëshin Shqipëri, Mal i Zi dhe Kosovë, krye bashkiaku i Tropojës Rexh Biberaj thotë se bashkëpunimi mes komunave ndërkufitare do të fokusohet në përmirësimin e infrastrukturës duke nxitur qeveritë e të tre vendeve për të injektuar fonde të përbashkëta por edhe përmes BE-së në këtë drejtim.

Biberaj tha se bashkia e Tropojës ka në plan te rishikojë edhe buxhetin dhe paketën fiskale për 6 mujorin e dytë të këtij viti me synim lehtësimin e bizneseve që kanë fokus turizmin.

Vitin e kaluar ashtu si në mbarë vendin edhe Tropoja kishte numër të lartë turistësh. Shifrat flasin për më shumë se 200 mijë turistë vendas e të huaj që kanë vizituar Luginën e Valbonës dhe zonat e tjera turistike të alpeve përgjatë vitit 2023.

/RTSH/