Ministri i Brendshëm, Ervin Demo, vlerësoi bashkëpunimin me partnerët italianë, duke theksuar se operacionet e përbashkëta janë rritur me mbi 52%. Ai nënvizoi se lufta kundër krimit të organizuar kërkon më shumë koordinim dhe përdorimin e teknologjive të reja.

Gjatë një konference të përbashkët me partnerët italianë të Guardia di Finanza, ku u prezantuan rezultatet e operacioneve kundër kultivimit të lëndëve narkotike, Demo bëri të ditur se vëzhgimi nga ajri ka nisur që në muajin maj, duke e cilësuar bashkëpunimin me palën italiane si të shkëlqyer.

“Ka një besim reciprok institucional për sa i përket luftës kundër krimit të organizuar. Progres-raporti i fundit i Komisionit Europian evidenton bashkëpunimin. Operacionet e përbashkëta me partnerët janë rritur më shumë se 52 për qind”, u shpreh Demo.

Ai theksoi se rezultatet e këtij bashkëpunimi janë konkretizuar edhe përmes sekuestrimit të pasurive kriminale, ndërsa shtoi se treguesi më i rëndësishëm i suksesit të institucioneve mbetet siguria që ndiejnë qytetarët.

“Lufta kundër krimit është detyrim ndaj qytetarëve, që presin nga ne mbrojtje”, tha Demo.

Ministri nënvizoi gjithashtu nevojën për intensifikimin e bashkëpunimit ndërkombëtar, duke argumentuar se grupet kriminale po përshtaten me zhvillimet teknologjike dhe ndryshojnë vazhdimisht mënyrat e tyre të veprimit.

Sipas tij, përballja me këto fenomene kërkon jo vetëm më shumë koordinim mes institucioneve, por edhe përshtatjen e metodave dhe mjeteve të luftës kundër krimit.

/rtsh.al/