Duke i rënë fyellit ruan tufën e dhenve, e tillë është përditshmëria e Halil Dishës, bari në fshatin Shishtavec.

“E kam bërë tani këtë fyellin, e kam lyer me bojë dhe e kam pikturuar”, tregon ai.

E gjithë jeta e tij është e lidhur me këtë zanat, të qenit bari ose çoban, Halili e cilëson zanat.

“Me këtë zanat jam marrë që kur kam lindur dhe tani që kam bërë 67 vjeç”, thotë ai.

Qoftë lodhjen apo kënaqësinë që merr nga ruajtja e dhenve e përshkruan me kushtet e motit.

“Shi, mjegull, këto të lodhin më shumë, se kur është e mirë koha kënaqem unë nëpër bjeshkë”, shprehet Halili

Jeta në fshat përkthehet me punë, një ndër arsyet që të rinjtë i ikin.

“Unë kam 3 djem e një vajzë. Jeta po punove është shumë e mirë, por po nuk punove nuk jeton dot”, thotë ai.

Halil Disha është shpresëplotë që shpejt fshatit do t’i rikthehet jeta si më parë.

Gazetare: Besjana Gërmizi

/rtsh/