Johnny Herbert nuk ka fshehur hidhërimin për atë që i ka ndodhur Michael Schumacher-it në dhjetorin e 2013-ës. Legjenda e Formulës 1 që prej atij aksidenti nuk është shfaqur më në publik dhe sipas familjarëve mësohet se ndiqet 24 orë në 24 nga një staf i specializuar mjekësh dhe infermierësh.

“Kemi humbur një mega yll të sportit tonë, i cili u ka dhënë aq shumë gëzim me garat e tij miliona tifozëve”, tha Herbert për “CasinoSite.nl”. “Më vjen shumë keq që Mick nuk ka pranë babain e tij tani që po mundohet që të futet në botën e Formula 1. Mungesa e Michael është një humbje e madhe për të gjithë komunitetin. Të gjithë kanë humbur nga mungesa e tij”, tha Herbert.

Schumacher është piloti më i spikatur i Formula 1 duke fituar titullin kampion në vitet 1994, 1995, 2000, 2001, 2002, 2003 dhe 2004. Ai gjithashtu ka regjistruar 71 xhiro të shpejta dhe 155 podiume gjatë karrierës të tij epike.